An binne gawar tsohon shugaban Sashen Hausa na Gidan Rediyon Muryar Amurka (VOA), Leo Keyen, yayin da ‘yan’uwa, abokan aiki da abokan arziki suka yi masa bankwana tare da bayyana shi a matsayin ƙwararren ɗan jarida, shugaba nagari, kuma mai jajircewa wajen bunƙasa aikin jarida da raya matasa.
Marigayi Leo Keyen ya rasu ne a ranar 22 ga Yunin 2026, yana da shekaru 70 a duniya, bayan ya shafe kusan shekara goma sha ɗaya yana fama da cutar Parkinson’s Disease.
Da yake jawabi, ɗan’uwan marigayin, Injiniya Noel Keyen, ya ce rasuwar ta yi wa iyali da abokansa babban rashi, amma sun amince da hukuncin Allah.
Marigayi Leo Keyen ya yi aiki a cibiyoyin yaɗa labarai da dama, ciki har da NTA da JIB, sannan ya kasance Daraktan Yaɗa Labarai na Jam’iyyar PDP ta ƙasa a zamanin marigayi Solomon Lar. Haka kuma, ya taba zama Babban Daraktan Gidan Rediyo da Talabijin na Jihar Filato (PRTV) sau biyu.
Daga shekarar 2011 zuwa 2018, Leo Keyen ya jagoranci Sashen Hausa na VOA, inda ya faɗaɗa ayyukan rediyo, talabijin da kafafen yanar gizo, lamarin da ya ƙara yawan masu sauraro da masu kallo a Najeriya, Nijar, Kamaru, Chadi da sauran ƙasashe.
Wasu daga cikin shirye-shiryen da ya assasa sun haɗa da Dandalin VOA, Taskar VOA da kuma Tattaunawa, waɗanda suka mayar da hankali kan siyasa, shugabanci da harkokin tsaro.
Tsohon Shugaban Gidauniyar Horas da Ma’aikata ta ITF, Sir Joseph Ari, ya ce ƙwarewar Leo Keyen ta taimaka wajen samar da ingantattun labarai da shirye-shiryen da suka amfani al’umma.
Shi ma tsohon abokin aikinsa a VOA, Malam Sahabo Imam Aliyu, ya bayyana marigayin a matsayin shugaba mai adalci da nagarta, yayin da Hajiya Madina Dauda Nadabo ta ce Leo Keyen mutum ne da bai nuna bambanci tsakanin ma’aikatansa.
Baya ga aikin jarida, marigayin ya kasance mai ƙarfafa gwiwar matasa wajen shiga harkokin kasuwanci da dogaro da kai.
A nasa jawabin, Hon. Kefiano Kefas Ropshik ya yi kira ga al’umma da su ci gaba da kula da iyalan marigayin tare da tuna gudunmawar da ya bayar ga ci gaban aikin jarida.
Marigayi Leo Keyen ya rasu ya bar matarsa guda ɗaya, ‘ya’ya huɗu da jikoki uku. Allah Ya jikansa da rahama. Ameen.
Ga Rahoton Wakiliyar GTA Hausa Amurka Ke Magana Zainab Babaji Daga Jos
