Sakataren tsaron Amurka, Pete Hegseth ya kori shugaban sojojin kasar Randy George a jiya Alhamis, kamar yadda wasu jami’an tsaro su biyo da wata majiya dake da masaniya kan abun suka shaidawa kamfanin dillancin labarai na Reuters.
Hegseth, wanda da ke yada shirye shirye a kafar yada labarai ta Fox News yayi azama wajen sauya fasalin ma’aikatar ta tsaro, inda ya kori janar-janar da wasu manyan jami’ai na soja domin dabbaka tsarin tsaron kasa na shugaba Donald Trump.
Ma’aikatar tsaron Amurka ta Pentagon ta tabbatar da cewa Randy George, wanda yake da ragowar fiye da shekara daya kafin wa’adin aikin sa ya kare, zai yi ritaya kai tsaye daga matsayin sa na shugaban sojoji na 41.
Pentagon bata bada wani dalilin barin sa daga wajen ba, abinda yake zuwa yayin da Amurka ke tattara sojojin ta a Gabas ta Tsakiya yayin da take ci gaba da kaiwa Iran hari.
