An gudanar da sallar jana’izar Hajiya Umma El-Rufai, mahaifiyar tsohon gwamnan Jihar Kaduna Nasir El-Rufai, a National Mosque Abuja da ke birnin Abuja a Najeriya.
Jana’izar ta samu halartar manyan ‘yan Najeriya daga sassa daban-daban na rayuwa. Daga cikin waɗanda suka halarta akwai attajirin ɗan kasuwa Aliko Dangote, Sarkin Kano Muhammadu Sanusi II, mai bai wa Shugaban Ƙasa shawara kan harkokin tsaro Nuhu Ribadu, da kuma tsohon mataimakin shugaban ƙasa Atiku Abubakar.
Sauran sun haɗa da gwamnan Jihar Kaduna Uba Sani, gwamnan Jihar Borno Babagana Zulum, gwamnan Jihar Neja Mohammed Bago, da tsohon gwamnan Jihar Zamfara Abdulazeez Yari.
Haka kuma, jana’izar ta haɗa da halartar gwamnoni, sanatoci, sarakunan gargajiya, ‘yan kasuwa da sauran manyan shugabanni daga faɗin ƙasar.
An gudanar da jana’izar cikin yanayi na nutsuwa da jimami, inda aka yi addu’o’i domin Allah Ya jikanta da rahama, Ya kuma gafarta mata kurakuranta.
