Allah Ya Yiwa Shahararren Dan Jarida Saleh Shehu Ashaka Rasuwa
Allah ya yi wa daya daga shahararrun wakilan kafafen labaru na duniya a Najeriya Saleh Shehu Ashaka rasuwa bayan fama da jinya.
Saleh Ashaka wanda ya kara shahara a aikin jarida lokacin da ya yi aiki da Sashen Hausa na Muryar Amurka Voa a matsayin wakili daga Abuja, ya shafe shekaru ya na rubuce-rubuce kan yaki da cin hanci da rashawa da kafa gwamnatin adalci da a kan wallafa a jaridu ciki da Daily Trust.
Ashaka ya kasance cikin ‘yan jarida da wasu kafafe irin Aljazeera da CNN kan tuntuba kan muhimman labaru kuma ya na da tasiri a ayyukan da ya kan wallafa a dandalin X da Instagram.
Saleh Ashaka ya yi hulda da manyan ‘yan jarida irinsu Aliyu Mustapha Sokoto na Voa, Ibrahim Alfa Ahmed, Christine Amanpour da sauransu.
A Abuja ya yi aiki tare da Nasiru Adamu El-hikaya, Madina Dauda, Umar Farouk Musa da sauran wakilai.
An haifi Saleh Ashaka a Jos jihar Filato a 1983 a cikin iyalin attajiri Alhaji Shehu Ashaka daga Kano da kuma mahaifiyarsa Hajiya Hauwa Tafisu daga jihar Adamawa.
Matashi, mai hazaka da mutunta jama’a, ya kai ziyara wajen mahaifiyarsa da ta je jinya a Alkahira wato CAIRO na kasar Masar wacce ta je jinya, inda a nan shi ma jinyarsa ta tashi kuma bayan kimanin kwana 10 na zafin jiki, Allah ya karbi rayuwarsa.
‘Yan uwa da abokan aiki na cikin juyayi da taya juna ta’aziyyar rasuwar marigayin cikin yanayi na kaduwar zukata.
