Gidauniyar Danbayo ta raba kayayyakin koyo da koyarwa ga makarantu shida da ke unguwar Jekadafari a Gombe, a wani mataki na tallafa wa ilimin firamare, inganta yanayin karatu da kuma bunƙasa walwalar ɗalibai.
An gudanar da rabon kayayyakin ne a ranar Laraba, 21 ga Oktoba, 2026, ƙarƙashin shirin gidauniyar na shekarar 2026 mai taken Mega Educational Support Programme, inda aka samar da kayayyakin ilimi sama da 3,000 waɗanda ake sa ran za su amfanar da ɗalibai kusan 3,000.
Kayayyakin da aka raba sun haɗa da rajistar aji, littattafan tsara darasi, alkaluman rubutu na allo (markers), goge allo, littattafan rubutu, biro, masassaka, fensir, littattafan zane, goge rubutu, na’urorin wasa fensir da sauran muhimman kayayyakin koyo da koyarwa ga malamai da ɗalibai.
Da yake jawabi a wajen taron, wanda ya kafa gidauniyar, Ambasada Yusuf Musa Danbayo, ya ce an ƙaddamar da shirin ne domin tallafa wa malamai, ƙarfafa ɗalibai, rage wa iyaye nauyin kuɗaɗen karatun ’ya’yansu da kuma bayar da gudummawa wajen bunƙasa ilimi a Jihar Gombe.
Shugaban Hukumar Ilimin baidaya ta Jihar Gombe (SUBEB), Farfesa Hassan Bello, wanda shi ne babban baƙon girmamawa a wajen taron, ya bayyana tallafin a matsayin wanda ya zo a kan lokaci, tare da kira ga malamai da su ƙara himma wajen gudanar da ayyukansu, kiyaye ladabi da kuma koyar da ɗalibai kyawawan ɗabi’u.
Shi ma Kwamandan Rundunar Sojoji ta 27 Armoured Brigade, Birgediya-Janar M. S. Sule, ya yaba wa wannan yunƙuri tare da kira ga daidaikun mutane da ƙungiyoyi da su ci gaba da tallafa wa ayyukan gidauniyar.
Haka kuma, Hakimin Jekadafari, Alhaji Abdullahi Doma, ya buƙaci iyaye da masu kula da yara da su ba ilimin ’ya’yansu muhimmanci domin samar musu da kyakkyawar makoma.
Wasu daga cikin ɗaliban da suka amfana da tallafin sun nuna godiyarsu ga gidauniyar, tare da kira ga sauran masu hali da su yi koyi da wannan abin alheri ta hanyar bayar da gudummawa wajen bunƙasa harkar ilimi.
Wannan tallafi ya ƙara tabbatar da aniyar Danbayo’s Foundation na inganta damar samun ingantaccen ilimi da samar da kyakkyawan yanayin koyo ga yara, musamman waɗanda ke cikin al’ummomin da ke buƙatar tallafi.
