Shugaban Ƙasa, Bola Ahmed Tinubu, ya ƙaddamar da aikin gina babbar hanyar Akwanga–Jos–Bauchi–Gombe–Biu–Maiduguri, a wani mataki da gwamnatin tarayya ta ce zai inganta hanyoyin sufuri da bunƙasa tattalin arziki a sassan Arewacin Najeriya.
An gudanar da bikin ƙaddamar da aikin ne a garin Akwanga na jihar Nasarawa, inda Shugaban Jam’iyyar APC na ƙasa, Farfesa Nentawe Yilwatda, ya wakilci Shugaba Tinubu.
A cewar gwamnatin tarayya, aikin na daga cikin manyan ayyukan da ake aiwatarwa ƙarƙashin shirin Renewed Hope Agenda, domin haɗa yankunan tekun Najeriya, savanna da yankin Sahel ta hanyar ingantacciyar hanyar mota, da nufin ƙarfafa kasuwanci, sauƙaƙa zirga-zirga da haɓaka tattalin arzikin ƙasa.
Da yake jawabi a wajen taron, Farfesa Yilwatda ya ce aikin ya nuna ƙudirin gwamnatin Shugaba Tinubu na samar da ingantattun ababen more rayuwa da za su haifar da ci gaban tattalin arziki, ƙarfafa haɗin kan ƙasa da kuma inganta rayuwar al’ummar Najeriya.
A nasa jawabin, Gwamnan jihar Gombe kuma Shugaban Ƙungiyar Gwamnonin Jihohin Arewa, Muhammadu Inuwa Yahaya, ya yabawa Shugaba Tinubu kan ba da fifiko ga ayyukan gine-ginen ababen more rayuwa.
Ya ce idan aka kammala aikin, zai haɓaka kasuwanci, rage lokacin tafiya, inganta tsaro, samar da guraben aikin yi tare da haɗa al’ummomi da kasuwanni a sassa daban-daban na ƙasar.
Shi ma Gwamnan jihar Plateau, Caleb Muftwang, ya ce al’ummar Arewacin Najeriya na yaba da yadda gwamnatin tarayya ke rabon ayyukan ci gaba cikin adalci, yana mai bayyana babbar hanyar a matsayin ɗaya daga cikin manyan ayyukan da za su kasance abin tunawa a gwamnatin Shugaba Tinubu.
A nasa ɓangaren, Ministan Ayyuka, Injiniya David Umahi, ya bayyana cewa za a aiwatar da aikin ne bisa ƙa’idojin aikin injiniya na zamani ta hannun ƙwararrun kamfanoni, yana mai cewa hakan zai inganta harkokin sufuri, rage kuɗin jigilar kayayyaki da kuma buɗe sabbin damammakin tattalin arziki ga yankunan da hanyar za ta ratsa.
Tun da farko a ranar, Gwamna Inuwa Yahaya ya halarci ƙaddamar da gadar ƙasa (Underpass) mai tsawon mita 600 da kuma sabbin hanyoyin cikin garin Akwanga, inda ya taya Gwamnan Jihar Nasarawa, Injiniya Abdullahi Sule, murnar kammala ayyukan tare da yabawa gwamnatinsa bisa ƙoƙarin bunƙasa ababen more rayuwa.
Daga cikin waɗanda suka halarci bikin akwai Gwamnan jihar Nasarawa, Injiniya Abdullahi Sule ɗan takarar gwamnan jihar Gombe na jam’iyyar APC, Jamilu Isyaku Gwamna ɗan takarar gwamnan jihar Nasarawa na APC, Sanata Ahmad Aliyu Wadada da kuma sanatoci, ‘yan majalisar wakilai da sauran manyan baƙi daga jihohin Gombe, Nasarawa da Plateau.
