Haka kwatsam, shugaba Donald Trump ya janye barazanar sanya kudin fito kan kayayyakin wasu kasashen Turai dake adawa da manufarsa ta mallakar yankin Greenland, ya ce ba zai yi amfani da karfin soja ba, ya kuma nuna alamun cewa akwai wata yarjejeniya da ake yunkurin kullawa domin warware wannan takaddamar dake barazanar rusa kawancen kasashen NATO.
A bayan da ya gana da sakatare janar na kungiyar tsaron NATO, Mark Rutte a kasar Switzerland wajen taron kolin tattalin arziki na duniya, Trump yace ana iya kulla yarjejeniya kan wannan tsibiri mai muhimmanci na Greenland mai mutane dubu 57, wadda zata biya masa bukatarsa ta kafa garkuwar makamai masu linzami da samun ma’adinai masu muhimmanci.
Ba a san wace irin yarjejeniya ce za a iya kullawa da zata biya bukatun Trump na neman mallakar wannan tsibiri kai tsaye ba, tsibirin da mutanenta da shugabanninta baki daya suka ce ba ta sayarwa ba ce.
