Shugaban Faransa Emmanuel Macron ranar Asabar yace hukuncin da kotun kolin Amurka ta yanke ranar jumma’a akan harajin da shugaba Trump yake azawa cinikayya da Amurka, yace yana da kyau hakan, ya kasance akwai sashen gwamnati da zai iya takawa wani sashe birki, karkashin tsarin Dimokraɗiyya.
“Babu laifi idan ana da kotun koli, ma’ana akwai doka da oda,” Macron ya fada da yake amsa tambaya dangane da hukuncin da kotun kolin Amurkan ta yanke ranar jumma’a cewa matakan harajin da shugaba Trump ya dauka a baya, basa bisa doka.
Ya kara da cewa Faransa zata yi nazarin makomar sabon harajin na kashi 10 cikin dari ga dukkan kasashen duniya masu hulda da Amurka ta fuskar kasuwanci, domin inji Macron, Faransa tana son ta ci gaba da sayar da kayayyaki da take sarrafawa da suka hada da kayan amfanin gona, kayan alatu, da kwanbo, da kuma ta fuskar jiragen sama.
Yace akwai bukatar ya kasance akwai tsinkaya, inda kasashe za su sakawa juna, ba wai kawai a yi ta gaban kai wajen mu’amala da ba.
Ahalinda ake ciki kuma, dubban ‘yan Faransa ne suka yi maci a yau Asabar a birnin Lyon, inda a makon jiya aka kashe wani mai ra’ayin mazan jiya, da ake zargin ‘yan tsantsi ne suka masa duka har lahira. Lamari da yayi matukar kada ‘yan kasar.
‘Yan sanda sun bayyana damuwar macin na yau Asabar ya zama tarzoma saboda birnin na Lyon yana cike da masu ra’ayin rikau da kuma ‘yan tsantsin.
