Hukumar Yaƙi da Cin Hanci da Rashawa ta Najeriya (EFCC) reshen jihar Kano, a ranar Talata 3 ga Fabrairu, 2026, ta kama fitacciyar jarumar masana’antar Kannywood, Samha Inuwa, bisa zargin lalata kuɗin Naira.
An kama Samha Inuwa ne bayan wani faifan bidiyo ya bazu a kafafen sada zumunta, inda aka gan ta tana goge majina daga hancinta da takardun kuɗin Naira, lamarin da ya janyo ce-ce-ku-ce a tsakanin jama’a.
Bayan bayyanar bidiyon, EFCC ta ce ta fara bincike nan take, inda daga bisani ta gano inda take tare da cafke ta domin amsa tambayoyi kan lamarin.
A halin yanzu, ana tsare da wadda ake zargin a ofishin hukumar na Kano yayin da ake ci gaba da gudanar da bincike.
Hukumar ta bayyana cewa za a gurfanar da Samha Inuwa a gaban kotu da zarar an kammala bincike.
