Gwamnatin jihar Zamfara a Najeriya ta ƙaddamar da sabbin motocin yaƙi masu sulke (Armoured Personnel Carriers APCs) tare da gabatar da ingantaccen tsarin jiragen sama marasa matuƙi na sa-ido (Unmanned Aerial Systems – UAS), a wani muhimmin mataki na ƙarfafa tsaro da kare rayuka da dukiyoyin al’umma.
Gwamnan jihar, Dauda Lawal, ne ya jagoranci sayo motocin da sauran kayan aikin tsaro, a cewar gwamnatin, domin aiwatar da manufofinsa na magance matsalolin tsaro, musamman barazanar ‘yan bindiga da hare-haren makamai da suka shafi al’ummomi da dama a cikin jihar a ‘yan shekarun nan.
Bikin ƙaddamar da kayan aikin ya gudana ne a Fadar Gwamnatin jihar dake Gusau, inda Ministan Tsaro, Christopher Musa, ya jagoranci kaddamarwar tare da jaddada muhimmancin haɗin gwiwa tsakanin gwamnatocin jihohi da hukumomin tsaro na tarayya wajen tinkarar matsalolin tsaro.
Sabbin kayan aikin da aka ƙaddamar sun haɗa da motocin yaƙi masu sulke da kuma jiragen sama marasa matuƙi na zamani, waɗanda Gwamnatin Jihar Zamfara ta tanada domin tallafa wa ayyukan rundunar ‘yan sanda da sojoji, musamman a fannonin sa-ido, gano maɓoyar masu laifi, da kuma saurin kai ɗauki a lokutan gaggawa.
Manyan baƙi da suka halarci taron sun haɗa da ‘yan Majalisar Dokokin jihar Zamfara, kwamishinoni, masu ba gwamna shawara na musamman, shugabannin gargajiya da na addini, jagororin siyasa, da shugabannin hukumomi da ma’aikatun gwamnati sannan kuma, manyan hafsoshin tsaro da shugabannin hukumomin tarayya masu aiki a jihar sun kasance cikin mahalarta taron.
Jami’an gwamnati sun bayyana cewa haɗa motocin yaƙi masu sulke da fasahar jiragen sa ido na zamani zai ƙara inganta tattara bayanan sirri, saurin kai farmaki kan masu aikata laifi, da kuma dawo da kwarin gwiwar al’umma kan tsarin tsaron jihar.
