Shugaba Bola Ahmed Tinubu na Najeriya ya ayyana dokar-ta-baci a bangaren tsaro a fadin kasar, ya umurci rundunar soja da ta ‘yan sanda da su gaggauta daukar dubban sabbin kurata domin shawo kan tashe-tashen hankula a kasar.
Shugaba Tinubu yace za a dauki sabbin ‘yan sanda dubu 20, abinda zai kara yawansu zuwa dubu 50, ya kuma bayar da iznin yin amfani da sansanonin masu aikin bautar kasa a zaman wuraren horas da sabbin kuratan. Har ila yau ya bada umurnin janye ‘yan sandan dake gadin manyan mutane, a sake maida su wurin horaswa domin a tura su bakin daga.
Shugaban na Najeriya ya ba ‘yan sandan leken asiri na cikin gida, DSS, izinin tura kwararrun masu gadi zuwa cikin dazuzzuka tare da diban wasu kari domin zakulo ‘yan ta’adda dake boye cikin dazuzzuka.
Tinubu ya ce daga yanzu babu wurin buya ga dillalan shedan a cikin daji.
Wannan jawabi na shugaba Tinubu ya biyo bayan hare-haren da aka kai cikin ‘yan kwanakin nan a jihohin Kebbi, Borno, Zamfara, Naija, Yobe da Kwara inda aka kashe fararen hula da dama aka saci wasu.
Shugaban na Najeriya yayi kira ga majalisar dokoki da ta sake nazarin dokokin kasa don ba jihohi ikon kafa rundunonin ‘yan sanda, yayin da ya roki makiyaya da su rungumi tsarin yin kiwo a wurin da za a kebe na kiwo zalla, su kuma mika makamansu don gujewa yawan fadace fadace da manoma.
