Rundunar ’Yan Sandan jihar Gombe ta ce ta samu gagarumar nasara a ayyukan da take gudanarwa na yaƙi da garkuwa da mutane, ’yan bindiga, safarar miyagun ƙwayoyi da sauran laifuka a faɗin jihar.
Rundunar ta ce a ranar 8 ga Satumba, 2026, da misalin ƙarfe takwas na safe, jami’an ’yan sanda, sojoji, Hukumar Tsaron Fararen Hula ta Najeriya (NSCDC), ’yan banga da mafarauta, ƙarƙashin jagorancin Jami’in ’Yan Sandan Sashen Dukku, sun gudanar da samame a wasu maboyar miyagu da ake zargi a yankin Kowagel na Ƙaramar Hukumar Dukku da kuma wasu sassan Bojude a Ƙaramar Hukumar Kwami.
A yayin samamen, jami’an tsaron sun kama wani mutum mai suna Manu Alhaji Sani, mai shekaru 30, ɗan ƙauyen Wawa a Ƙaramar Hukumar Funakaye, wanda rundunar ta bayyana a matsayin wanda ake zargi da kasancewa cikin ƙungiyar masu garkuwa da mutane.
Rundunar ta ce yayin binciken farko, wanda ake zargin ya amsa cewa yana da hannu a wasu ayyukan garkuwa da mutane da aka gudanar a ƙananan hukumomin Dukku, Kwami da Funakaye, tare da wasu ’yan ƙungiyarsa da har yanzu suke kan gudu.
Bayan kama shi, jami’an tsaron sun ƙara matsa lamba tare da ci gaba da gudanar da bincike da samame a yankin. A cewar rundunar, wannan matakin ya tilasta wa sauran ’yan ƙungiyar tserewa, inda suka bar mutane uku da suka yi garkuwa da su.
Daga bisani jami’an tsaron sun kuɓutar da mutanen ukun, waɗanda suka haɗa da Hauwa Alhaji Sani, mace mai shekaru 44; Aishatu Alhaji Sani, yarinya mai shekaru 16; da Umaru Alhaji Sani, yaro ɗan shekaru biyu.
Rundunar ta ce dukkansu mazauna ƙauyen Jonde, da ke Ƙaramar Hukumar Dukku ne.
A yayin samamen, jami’an tsaron sun kuma kwato babur ɗin Honda mai lambar rajista BBB 29 UT, da kuma wayoyin hannu masu maballan guda uku.
Rundunar ta ce ana ci gaba da ƙoƙarin cafke sauran waɗanda ake zargi da suka tsere domin tarwatsa ƙungiyar masu aikata laifukan gaba ɗaya.
An Kama Wanda Ake Zargi da Safarar Tramadol
A wani ci gaba kuma, a ranar 8 ga Satumba da misalin ƙarfe tara na safe, jami’an Safer Highway Patrol, tare da haɗin gwiwar Operation Hattara, sun kama wani mutum da ake zargi da safarar miyagun ƙwayoyi.
Rundunar ta ce jami’an, waɗanda ke aikin sintiri a kan hanyar Liji zuwa Biu, sun samu sahihin bayanan sirri, inda suka tare wata motar Peugeot 406 mai launin shuɗi, mai lambar rajista YDB 48 FL.
Bayan binciken motar, jami’an sun kama wani mutum mai suna Mohammed Abdullahi, wanda aka fi sani da ‘Babangida’, mai shekaru 37, ɗan Bomala Quarters a Gombe.
Rundunar ta ce binciken motar ya kai ga gano sachets 2,500 na ƙwayoyin Tramadol masu nauyin milligram 100 kowacce.
Mohammed Abdullahi da kayan da aka kwato suna hannun ’yan sanda, yayin da bincike ke ci gaba domin gano inda ƙwayoyin suke zuwa da kuma sauran mutanen da ka iya kasancewa cikin harkar.
Kwamishinan ’Yan Sandan Jihar Gombe, CP Umar Ahmed Chuso, ya yaba wa jami’an tsaro bisa haɗin gwiwar da suka nuna wajen gudanar da ayyukan, tare da jinjinawa jajircewarsu, ƙarfin hali da kuma gaggauta ɗaukar mataki bisa sahihan bayanan sirri.
Kwamishinan ya sake jaddada aniyar rundunar na ci gaba da gudanar da ayyukan tsaro da suka dogara da bayanan sirri domin yaƙi da garkuwa da mutane, ’yan bindiga, safarar miyagun ƙwayoyi da sauran laifuka a jihar.
Rundunar ta kuma yi kira ga jama’a da su kasance cikin ƙarin taka-tsantsan, tare da gaggauta sanar da jami’an tsaro duk wani abin da suke zargi ko kuma bayanin da zai taimaka wajen dakile ayyukan masu aikata laifuka.
Rundunar ta bayar da lambobin wayar gaggawa 0815 056 7771 da 0903 643 5359 domin jama’a su kai rahoton duk wani abin da suka lura da shi.
