Uganda tana son sabon aikin layin dogo da take yi ya hade da Tanzania, kamar yadda yake kunshe cikin wasu bayanai da kamfanin dillancin labarai na Reuters ya gani, wadda hakan zai baiwa kasar wata damar jigilar ma’adinai da suka hada da zinari, copper da kuma karafa.
Yanzu haka dai Uganda tana tura galibin kayayyaki da take kaiwa ketare ta tashar jirgin ruwa na Mombasa dake Kenya, tuni dama ta bada sanarwar shirinta na hade hanyoyin dogo daga kasar dana Kenya wadda ake aiki akai ahalin yanzu.
Takardun ma’aikatar ayyuka na Uganda ya nuna cewa hanyar dogon ko jirgin kasa zai tashi daga kan iyakar kasar da Tanzania zuwa kudanci da yankin kudu maso yammacin kasar, inda zai kare a garin da ake kira Mpondwe dake kan iyakar kasar da jamhuriyar demokuradiyyr kwango.
“Babban burin wannan aiki shine hade manyan sassan kasashen biyu masu arzikin ma’adinai, watau a Uganda da Tanzania zuwa ga tashar jirgin ruwa dake Dar es salaam, wadda zai taimaka wajen rage kudi da lokacin jigila,” kamar yadda takardun suka yi bayani.
