Bankin duniya yana shirin zai baiwa Mozambique rancen kudi dala bilyan shida galibi da sassaucin gaske domin ayyukanta na samar da abubuwan more rayuwa ga al’umarta cikin shekaru biyar masu zuwa, kamar yadda wani babban jami’in bankin ya fada ranar Litinin.
Baitul malin gwamnatin kasar yana fuskantar mawuyacin hali, har ma asusun bada lamuni na duniya da ake kira IMF a takaice yayi gargadi cikin makon jiya kan yadda yawan bashi yake raunata tattalin arzikin kasar.
“Bankin ya tanadi dala bilyan uku, kuma muna sa ran hada kan wasu dala bilyan uku,” inji Fily Sissoko, darektan yanki na bankin duniya mai kula da kasashen Mozambique, Madagascar, Mauritius, Sechelles, da Comoros, yayinda yake magana da manema labarai.
Bankin mai helkwata a birnin Washington DC, yana kuma fatar samar da wasu kudade dala bilyan hudu domin tallafawa ‘yan kasuwa.
Wannan kawance ko hadin kai, burinsa shine tabbatar da karfafa harkokin tattalin arziki, da zimmar ci gaba da ganin tattalin arziki yana farfadowa, kamar yadda ministan harkokin kudin kasar Carla Louveira ta fada.
