Gwamnan ya ce ana gudanar da ayyukan ne a ƙarƙashin shirin Network-1100, wanda aka tsara domin gina hanyoyi masu tsawon kusan kilomita 1,100 a faɗin ƙananan hukumomi 11 na jihar Gombe.
Ya bayyana cewa yayin da gwamnatinsa ke shiga matakin ƙarshe na wa’adinta, an riga an kammala gina hanyoyi masu tsawon sama da kilomita 1,000, lamarin da ya bayyana a matsayin babbar nasara a ƙoƙarin bunƙasa ababen more rayuwa a jihar.
Gwamna Inuwa Yahaya ya ƙara da cewa faɗaɗa hanyoyin zai sauƙaƙa zirga-zirgar jama’a da jigilar amfanin gona, inganta hanyoyin isa kasuwanni da wuraren samun hidimomin yau da kullum, tare da ƙarfafa harkokin tattalin arziki a faɗin Jihar Gombe.
A dukkan wuraren da aka gudanar da bukukuwan ƙaddamar da ayyukan, Babban Sakataren Dindindin na Ma’aikatar Ayyuka, Danladi Adamu, ya yi cikakken bayani kan ayyukan da aka gudanar da kuma muhimmancinsu ga al’ummomin yankunan.
