Ƙungiyar Gwamnonin Arewacin Najeriya (NNGF) ta bayyana matuƙar alhini da jimami bisa rasuwar Babban Sakataren Majalisar Ƙoli ta Shari’ar Musulunci a Najeriya (SCSN), Malam Nafiu Baba-Ahmed, wanda ya rasu a yau.
A cikin wata sanarwa Shugaban Ƙungiyar Gwamnonin Arewacin Najeriya, kuma Gwamnan jihar Gombe, Muhammadu Inuwa Yahaya ya bayyana marigayin a matsayin mutum mai hikima, adalci da kishin ɗabi’a, wanda gudunmawarsa wajen tattaunawar al’amuran ƙasa ta sanya ya samu girmamawa a Arewacin Najeriya da ma ƙasar baki ɗaya.
Gwamna Inuwa Yahaya ya ce rasuwar Nafiu Baba-Ahmed babban rashi ne ga Arewacin Najeriya, al’ummar Musulmi da kuma ƙasar baki ɗaya.
Ya bayyana cewa Najeriya ta yi rashin wata murya mai ƙarfi da tsayawa kan gaskiya, wadda shawarwari da tsoma bakinta a cikin muhimman al’amuran ƙasa suka taimaka wajen inganta tattaunawar jama’a da kuma ƙarfafa manufofin adalci da ɗaukar nauyin al’umma.
Gwamna Inuwa Yahaya ya miƙa saƙon ta’aziyyarsa ga iyalan marigayin, shugabanci da mambobin Majalisar Ƙoli ta Shari’ar Musulunci a Najeriya, Gwamnati da al’ummar Jihar Kaduna, da kuma daukacin al’ummar Musulmi.
Ya roƙi Allah Maɗaukakin Sarki da Ya gafarta wa marigayin kura-kuransa, Ya yawaita masa ladan kyawawan ayyukansa, Ya kuma sanya Aljannatul Firdausi ta zama makomarsa.
