Hukumar tsaro ta farin kaya a Najeriya DSS ta gayyaci Yusuf Datti Baba-Ahmed, mataimakin Peter Obi, dan takarar shugabancin karkashin Jam’iyyar LP, a zaben 2023.
Kafofin labarai na cikin gida a Najeriya, sun ruwaito majiyoyi a hukumar na cewa, hukumar ta DSS na tuhumar Yusuf Datti da kalaman tunzura Jama’ar ta kafofin labarai na kasar, musamman ikirarin sa na cewa, ana cikin rudani game da sha’anin kundin tsarin mulkin kasa.
Majiyoyin sunce “A baya bayan nan, Yusuf Datti Baba-Ahmed ya bayyana a kafar talabijin yana mai zargin banagaren shari’a dana rundunar sojin Najeriya da bari a rantsar da shugaba Bola Ahmed Tinubu da mataimakinsa, Kashim Shettima”.
Majiyoyin sunce kalaman na sa nada wata manufa da ka iya haifar da rudani , la’akari da sarkakiya da dumamar yanayin siyasar Najeriya.
Sai dai majiyar hukumar ta DSS, tayi bayanin cewa, sammacin da hukumar ta yiwa Yusuf Datti ya bayyana a gabanta baya nufin muzgunawa, amma tattaunawa dashi akan batutuwan daya bijiro dasu, ka iya bada damar daukar matakan da suka dace, domin kare gurguwar fahimtar haifar da yamutsin da ba’a zato a tsakanin al’uma.
Ya zuwa lokacin wallafa wannan rahoto, babu wata sanarwa a hukumance daga hukumar ta DSS dake karin haske game da sammacin da ta aikawa Yusuf Baba-Ahmed.
