A jiya Lahadi Sakataren harkokin wajen Amurka Marco Rubio ya kira wani rahoto da cewar yana tattare da “damuwa” rahoton da wasu kasashe kawayen Turai biyar suka dorawa kasar Rasha laifin kashe mai sukar lamirin Kremlin Alexei Navalny ta hanyar amfani da guba, yana mai karawa da cewa Washington ba ta da wani dalili na yin tambaya.
“Tabbas muna sane da rahoton. Rahoto ne mai tada hankali. Muna sane da wannan lamarin na Mista Navalny kuma tabbas ba mu da wani dalili na tambayarsa,” Rubio ya shaida wa manema labarai a wani taron manema labarai a Bratislava a ziyarar da ya kai Slovakia.
A cikin wata sanarwa ta hadin gwiwa, Birtaniya, Faransa, Jamus, Sweden da Netherlands a ranar Asabar sun ce nazarin samfurori daga jikin Navalny “a ƙarshe” ya tabbatar da kasancewar an samu nau’in wani sinadari a cikin jikin shi
Gwamnatin Rasha, wacce ta sha musanta alhakin mutuwar Navalny a lokacin da ake tsare da shi a wani yankin Arctic shekaru biyu da suka gabata, ta yi watsi da wannan zargi na baya-bayan nan da cewa “wannan farfagandar kasashen yamma ne,” a cewar kamfanin dillancin labaran kasar Rasha TASS
