Farashin kasuwar yawon bude ido a kasuwannin hada hadar hannun jari ya fadi a ranar Litinin, inda yayi asarar dala miliyan dubu 22 da miliyan shida, saboda kawo ya mutsi a tashin jiragen sama masu daukan matafiya da yakin Amurka, Isra’ila da Iran ya haifar a duk fadin duniya.
Ya kuma sa an rufe manyan tasoshi a gabas ta tsakiya, farashin man fetur kuma yayi tashin gwaron zabi. Masu nazari sun yi gargadin cewa wannan hargitsin zai iya shafe makonni ana cikin sa.
Tasoshin jiragen sama na Dubai da Doha sun kasance a rufe yau kwanaki 3, inda dubbannan matafiya suka shiga halin kila wa kala. Wannan ita ce mafi girman matsala da zirga-zirgar jiragen sama ta taba samun tun bayan lokacin annobar Corona.
Farashin man fetur ya tahi da kashi 13 cikin 100. Wannan shine karin farashi mafi yawa da ba’a samu irin sa ba tun a watan Janairun bara. Tashin man ya biyo bayan rufe mashigan ruwa na Hormuz da Iran ta yi, inda ana nan ne ake jigilar kashi 5 na danyen man fetur na duniya, ta gabar bakin tekun Iran. Farashin hannun jari na jiragen jigila na Amurka ya fadi.
American Airline da United Airline sun fadi da fiye da kashi 6 cikin 100. Wasu kamfanonin jiragen sama 29, da gidajen kwana na hotel da kuma kamfanonin tafiye-tafiye sun yi asarar miliyan dubu 22 da miliyan 6a kasuwar hannun jari a yau Litinin
