A Senegal, masu goyon bayan a kafa dokoki masu tsanani kan ‘yan luwadi da madugo a kasar, sunyi musayar ra’ayi kan yadda za su kaddamar da gangami da neman goyon bayan jama’a da wata kungiya dake Amurka mai goyon bayan iyali irin na gargajiya, wacce take cewa luwadi barazana ce kan kiwon lafiyar jama’a, kamar yadda ‘yan gwagwarmaya kan wannan batu a duka kasashen biyu suka fadawa kamfanin dillancin labarai na Reuters.
Kungiyar dake nan Amurka mai suna MassResistance da turanci, an santa wajen goyon bayan dokoki da suke adawa da masu auren jinsi daya, kuma take tur da ruruta masu sauya jinsi, ta jima tana bada shawara ga masu ra’ayi irin tata a nahiyar Afirka.
Yanzu kungiyar tana kokari tayi amfani da yanayi na gwamnatin Trump, wacce bata bada fuska ba, ko kuma tana daukar matakai da suke dakile ‘yancin masu auren jinsi daya, ta fadada ayyukan zuwa wasu kasashe baya ga Senegal, kungiyar tana da hanu a kudurori na kafa irin wannan doka na adawa da ‘yan luwadi da madugo a Ghana.
