A yau talata Ukraine ta bayyana goyon bayanta ga tsarin cimma yarjejeniyar zaman lafiya da kasar Rasha, amma ta ce tilas sai an warware wasu muhimman batutuwan da suke kumshe cikin shirin a tattaunawa tsakanin shugaba Volodymyr Zelensky da shugaba Donald Trump na Amurka.
Wannan sako daga bitnin Kiev na nuni da cewa matsin diflomasiyyar da Amurka take yi ya fara janyo abubuwa na alkhairi, amma kuma duk wani dokin da ake da shi game da cimma zaman lafiyar na iya kasancewa na dan karamin lokaci, domin kuwa Rasha ta ce ba zata yarda duk wani matakin da za a yarda a kai yayi nesa sosai da bukatunta ba.
Mashawarta na Amurka da na Ukraine sun tattauna a kan shirin zaman lafiya na baya bayan nan da Amurka ta gabatar ranar lahadi a Geneva. Sannan a jiya litinin da kuma yau talata, sakataren rundunar sojan kasa ta Amurka, Dan Driscoll, ya gana da jami’an Rasha a Abu Dhabi.
Jami’an Amurka da na Ukraine suna kokarin rage abubuwan da ake da sabanin ra’ayi a kansu a game da shirin Amurka na kawo karshen yaki mafi muni da aka gani a nahiyar Turai tun bayan yakin duniya na biyu.
