Aikin tsaftar muhalli na wata-wata da aka gudanar a jihar Gombe ya samu gagarumar nasara, yayin da direbobi da masu gudanar da harkokin kasuwanci suka bi umarnin gwamnati na hana zirga-zirga a lokacin gudanar da aikin.
Wakilinmu da ya zagaya tare da kwamitin sa ido na Ma’aikatar Muhalli ta jihar Gombe ya lura cewa jami’an tsaro da aka jibge a wuraren bincike da mashigai sun hana ababen hawa da babura da suka yi yunkurin karya dokar zirga-zirga ci gaba da tafiya.
A Filin Tashar Motoci ta Ibrahim Hassan Dankwambo Mega Park, an ga motocin haya da fasinjoji suna jira cikin natsuwa har sai da aka kammala awanni uku na aikin tsaftar kafin su ci gaba da tafiyarsu.
Da yake zantawa da wakilinmu, Manajan Kula da Zirga-zirga na Gombe Line, Kwamared Sani Yaro, ya ce kamfanin ya yi dukkan shirye-shiryen da suka dace domin tabbatar da cikakken bin dokokin aikin tsaftar muhalli. Ya kuma ce mahukuntan Gombe Line sun kuduri aniyar ci gaba da tabbatar da tsaftar muhalli a tashar motocin.
Wasu direbobi, masu baburan haya (Achaba) da direbobin tasi da suka yi magana da wakilinmu sun bayyana cewa sun bi umarnin gwamnati ta hanyar dakatar da zirga-zirgarsu a wuraren da jami’an tsaro suka tanada har zuwa lokacin da aka kammala aikin.
Da yake tsokaci kan aikin, Babban Sakataren Hukumar Kula da Tsaftar Muhalli ta jihar Gombe (GOSEPA), Dakta Auwal Baba Jada, ya bayyana cewa an haramta duk wani zirga-zirgar ababen hawa a lokacin gudanar da aikin tsaftar. Ya jaddada cewa ba daidai ba ne direbobi su fito da motocinsu su tsaya a mashigai suna jiran lokacin da aikin zai kare.
Dakta Auwal Baba Jada ya yabawa al’ummar jihar bisa goyon baya da hadin kan da suka bayar, yana mai cewa hakan ya taimaka wajen samun nasarar aikin.
Shi ma da yake jawabi bayan duba yadda aka gudanar da aikin, Kwamishinan Muhalli da Gandun Daji na jihar Gombe, Alhaji Yusuf L. Jalingo, ya bayyana gamsuwarsa da yadda jama’a suka bi umarnin, yana mai cewa an gudanar da aikin cikin lumana ba tare da wata matsala ba.
Wakilinmu ya kuma ruwaito cewa a yankunan Sabon Layi, Liji da Titin Gombe Bypass an samu karancin zirga-zirga da harkokin kasuwanci, inda aka hangi ‘yan kalilan daga cikin direbobin motocin dakon ruwa suna gudanar da ayyukansu.
