Wata wasikar Email daga cikin takardun da ma’aikatar shari’ar Amurka ta wallafa kamar yadda doka ta bukata, ta nuna cewa shugaba Donald Trump yayi balaguro sau da yawa a cikin jirgin attajirin nan da aka samu da abin fallasa na lalata da ‘yan mata Jeffrey Epstein, fiye da yadda aka zata tun farko.
Wasikar dake cikin takardun da ala tilas ma’aikatar ta wallafa su ranar talata, wani mai gabatar da kararraki na jihar New York ya fada ranar 7 ga watam Janairun 2020 cewa takardun bayanai sun nuna cewa Trump yayi balaguro a cikin jirgin saman Epstein akalla sau 8 a shekarun 1990 kuma daga cikin wadannan tafiye-tafiye, akwai 4 wadanda wata abokiyar Epstein mai suna Ghislaine Maxwell take ciki, amma yanzu haka dai ita Maxwell tana zaman daurin shekaru 20 a gidan kurkuku, a bayan da aka same ta da laifin taimakawa attajirin Epstein wajen samar masa da yara mata kanana yana lalata da su.
A cikin wani sakon da ya rubuta a shafinsa na sada zumunci a shekarar da ta shige, 2024, Trump yace bai taba shiga cikin jirgin Jeffrey Epstein ba.
