Ƙasar Cuba ta ce ta fara ƙoƙarin dawo da wutar lantarki tun da sassafe a ranar Lahadi, bayan da tsarin rarraba wutar lantarki na ƙasar ya rushe karo na biyu cikin mako guda, a yayin da takunkumin man fetur na Amurka ke ci gaba da yi wa gundarin tsarin makamashin tsibirin illa mai tsanani.
Tsarin wutar ya rushe ne a yammacin ranar Asabar da misalin ƙarfe 6:32 na yamma (2232 GMT), bayan da wata babbar tashar samar da wuta a Nuevitas, a lardin Camaguey na gabashin Cuba, ta samu matsala ta daina aiki, a cewar kamfanin kula da wutar lantarki na ƙasar UNE. Wannan ya haddasa jerin matsaloli da suka janyo katsewar wuta ga kusan mutane miliyan 10 na ƙasar.
Ma’aikatar makamashi da ma’adinai ta Cuba ta ce da sassafe ranar Lahadi ta kafa ƙananan tsarin wutar lantarki masu zaman kansu a dukkan lardunan ƙasar, domin dawo da wuta ga muhimman ayyuka kamar asibitoci, samar da ruwa da rarraba abinci.
Ma’aikatar ta kuma bayyana a shafukan sada zumunta cewa tashoshin wutar lantarki guda biyu da ke aiki da iskar gas, waɗanda kamfanin Energas ke sarrafawa, suna aiki a yankunan Varadero da Boca de Jaruco, sannan an samu isar da wutar lantarki zuwa tashar Santa Cruz da ke amfani da man fetur.
