Ana sa ran farashin mai zai ƙara tashi a yau Litinin, bayan da ya rufe kasuwa kafin ƙarshen mako a mafi girman matsayinsa cikin kusan shekaru huɗu, sakamakon barazanar da Amurka da Iran suka yi na kai hari kan cibiyoyin makamashi, a cewar manazarta a jiya Lahadi.
Shugaban Amurka, Donald Trump, ya yi barazanar a ranar Asabar cewa zai “lalata gaba ɗaya” tashoshin wutar lantarki na Iran idan Tehran ba ta sake buɗe mashigar ruwan Hormuz gaba ɗaya cikin sa’o’i 48 ba. Wannan na nuna ƙarin tsanani a rikicin, kasa da kwana guda bayan ya yi maganar “rage zafin yaƙin,” wanda yanzu ya shiga mako na huɗu.
A nata ɓangaren, Iran ta yi gargaɗi a ranar Lahadi cewa za ta kai hari kan muhimman ababen more rayuwa da ke da alaƙa da Amurka, ciki har da cibiyoyin makamashi da na sarrafa ruwan teku zuwa ruwan sha a yankin Tekun Fasha, idan Trump ya aiwatar da barazanar tasa.
A ranar Juma’a, kasuwar Man Brent na watan Mayu sun rufe da ƙarin kashi 3.26 cikin ɗari, zuwa dala 112.19 kan kowace ganga, wanda shi ne mafi girma tun watan Yuli na shekarar 2022.
“Barazanar da Shugaba Trump ya yi yanzu ta sanya kasuwanni cikin wani yanayi na rashin tabbas mai tsanani na tsawon sa’o’i 48,” in ji Tony Sycamore, manazarcin kasuwa na kamfanin IG. Ya ƙara da cewa idan ba a janye wannan wa’adin ba, farashin mai zai yi tashin gwauron zabo a ranar Litinin.
