Mahukuntan Iran sun sanar da shirye-shiryen gudanar da jana’izar tsohon Jagoran Addini na kasar, Ayatollah Ali Khamenei, wanda ya rasu yana da shekaru 86 a duniya.
A cewar jami’an kasar, za a gudanar da jana’izar ne a manyan biranen Tehran, Qom da Mashhad cikin wani shiri na kwanaki uku da aka tanada domin bai wa miliyoyin ‘yan Iran da masu biyayya daga sassa daban-daban na duniya damar yi masa bankwana na karshe.
Rahotanni sun bayyana cewa za a fara gudanar da manyan tarukan addu’o’i da zaman makoki a Tehran, babban birnin kasar, inda ake sa ran miliyoyin mutane za su hallara domin girmama marigayin wanda ya jagoranci Iran na tsawon shekaru fiye da talatin. Jami’ai sun ce faretin jana’izar a Tehran kadai zai dauki akalla sa’o’i 24 saboda yawan mahalarta da ake tsammani.
Bayan kammala bukukuwan da za a yi a Tehran, za a ci gaba da jana’izar a birnin Qom, wanda ake kallonsa a matsayin cibiyar ilimin addinin Shi’a a Iran. Daga nan ne za a kai gawar zuwa Mashhad, garin haihuwarsa da ke arewa maso gabashin kasar, inda za a binne shi a Hubbaren Imam Reza bisa wasiyyarsa.
Mahukuntan Tehran sun ce mutane daga kasashe da dama, ciki har da Pakistan, Afghanistan, Indiya, Bangladesh da yankin Kashmir, na sa ran halartar jana’izar domin nuna girmamawa ga marigayin. Haka kuma, larduna daban-daban na Iran sun nemi damar karbar bakuncin tarukan makoki, lamarin da ke nuna irin tasirin da ya yi a fagen siyasa da addini.
Ana kallon wannan jana’iza a matsayin daya daga cikin mafi girman bukukuwan makoki da Iran za ta taba yi tun bayan jana’izar Ayatollah Ruhollah Khomeini a shekarar 1989, wadda ta jawo taron miliyoyin mutane daga sassa daban-daban na duniya.
Ali Khamenei ya kasance Jagoran Addinin Jamhuriyar Musulunci ta Iran tun daga shekarar 1989 har zuwa rasuwarsa, kuma mutuwarsa ta kawo karshen wani zamani mai muhimmanci a tarihin siyasar kasar.
