Tawagar Tsaro ta Musamman ta Ofishin Mai Bai Wa Shugaban Ƙasa Shawara Kan Harkokin Tsaro (ONSA), Mallam Nuhu Ribadu ta samu nasarar kuɓutar da wani magidanci Ahmed Zakka, matarsa da jaririyarsu mai watanni shida mai suna Fatima, waɗanda aka yi garkuwa da su a Jihar Kaduna.
An ceto iyalan ne a ranar Alhamis, bayan wasu ’yan bindiga sun yi awon gaba da su a Alrahus Estate da ke Millennium City, a Ƙaramar Hukumar Chikun ta jihar.
An sace Ahmed Zakka da iyalansa ne a ranar 6 ga Oktoba, 2026, lokacin da ’yan bindigar suka kai farmaki unguwar da misalin ƙarfe 11:30 na dare.
Majiyoyi sun tabbatar da cewa bayan kuɓutar da su, ana duba lafiyar ma’auratan da jaririyarsu a wani asibitin jami’an tsaro.
Nasarar ceton iyalan na nuna muhimmancin ƙoƙarin hukumomin tsaro wajen kuɓutar da mutanen da aka yi garkuwa da su da kuma kare rayukan al’umma, musamman mata da ƙananan yara da ke cikin haɗarin hare-haren ’yan bindiga.
