Hukumar Raya Yankin Arewa maso Gabashin Najeriya (NEDC), tare da haɗin gwiwar Cibiyar Koyar da Harshen Larabci ta Ƙasa da ke Ngala (NALV), ta ƙaddamar da shirin horas da malaman Tsangaya da Islamiyya guda 100 a Jihar Gombe na tsawon makonni biyu, domin inganta hanyoyin koyarwa na zamani da kuma bunƙasa zaman lafiya ta hanyar ilimi.
An gudanar da bikin ƙaddamar da shirin a Ƙaramar Hukumar Kwami, inda aka zaɓo mahalarta daga dukkan ƙananan hukumomi 11 na Jihar Gombe.
Taken horaswar shi ne: “Sabbin Hanyoyin Koyar da Harshen Larabci Domin Gina Zaman Lafiya.”
Da yake ƙaddamar da shirin, Mai Kula da Ayyukan Hukumar NEDC a jihar Gombe, Architect Usman Mohammed, ya ce horaswar na daga cikin ƙoƙarin hukumar na inganta ingancin ilimi da ƙarfafa ƙwarewar malamai a faɗin yankin Arewa maso Gabas.
Ya bayyana cewa shirin zai bai wa malamai sababbin dabaru da ƙwarewar koyarwa ta zamani, domin inganta koyo da koyarwa a makarantun Tsangaya da Islamiyya.
Da take jawabi a madadin Gwamnan jihar Gombe, Muhammadu Inuwa Yahaya, Kwamishiniyar Ilimi ta jihar, Farfesa Aishatu Umar Maigari, ta sake jaddada aniyar gwamnatin jihar na ƙarfafa ilimin bai ɗaya da bunƙasa koyon sana’o’i da ƙwarewa.
Farfesa Maigari ta bayyana cewa haɗa hanyoyin koyarwa na zamani da tsarin koyar da harshen Larabci na gargajiya zai taimaka wajen inganta ƙwarewar ɗalibai a karatu, rubutu, fahimta da sadarwa.
Ta ƙara da cewa gabatar da ayyukan koyon aiki, ciki har da rubutun ƙawata haruffan Larabci, zai ƙara jawo hankalin ɗalibai tare da inganta fahimtarsu.
Kwamishiniyar ta buƙaci mahalarta horaswar da su mai da hankali, su kuma yi amfani da ilimin da za su samu wajen inganta harkokin ilimi da bayar da gudummawa ga ci gaban jihar.
A nata jawabin, Mai Bai wa Gwamnan jihar Gombe Shawara ta Musamman kan Ilimin Tsangaya, Sayyada Amina Sheikh Dahiru Usman Bauchi, ta sake tabbatar da goyon bayan gwamnatin jihar ga shirye-shiryen da aka tsara domin inganta ilimin Tsangaya.
Ta tabbatar wa masu shirya horaswar cewa gwamnatin jihar za ta ci gaba da ba su haɗin kai domin tabbatar da cimma manufofin shirin.
Shi ma Shugaban Hukumar Ilimin Bai Ɗaya ta jiha (SUBEB), Farfesa Hassan Bello, wanda Darakta Gambo Adamu Aliyu ya wakilta, ya yaba wa NEDC bisa samar da wannan dama ta ƙarfafa ƙwarewar malaman Tsangaya.
Ya bayyana cewa an tsara horaswar ne domin bai wa malaman ilimi da ƙwarewar da za su taimaka wajen inganta koyar da harshen Larabci da kuma ɗaukaka matsayin ilimin Tsangaya da Islamiyya.
Shi ma Farfesa Kasimu Alkali, wanda ya yi jawabi a madadin cibiyar, ya gode wa gwamnatin Jihar Gombe da hukumar NEDC bisa goyon bayansu wajen inganta ilimin Almajirai da malaman Tsangaya.
Masu shirya shirin sun bayyana cewa an riga an gudanar da irin wannan horaswa a jihohin Borno, Yobe da Bauchi, tare da shirin faɗaɗa ta zuwa sauran jihohin yankin Arewa maso Gabas.
Ana sa ran za a bai wa mahalarta takardun shaidar kammala horaswa bayan kammala shirin na makonni biyu.
Ana sa ran shirin zai ƙarfafa ƙwarewar malamai, inganta hanyoyin koyar da harshen Larabci na zamani, tare da amfani da ilimi wajen bunƙasa zaman lafiya a faɗin yankin Arewa maso Gabas.
