Daga Zainab Babaji a Jos
A kalla mutane 23 sun rasa ransu, wassu 143 da ake zargin sun kamu da cutar ta diphtheria a fadin jihar Filato, cikin makonni biyu da suka gabata.
Kwamishinan lafiya na jihar Filato, Nicholas Baamlong ne ya bayyana hakan ga manema labarai a Jos.
A cewar Ba’amlong, gwamnatin jihar da ma’aikatar lafiya sun kara kaimi wajen dakile yaduwar cutar.
Yace matakan da suka dauka sun hada da killace majinyata a asibitin Jamia’r Jos, JUTH, da asibitin kwararru ta jihar Filato, ana musu jinya.
Ba’amlong ya ci gaba da cewa cutar diphtheria cuta ce mai saurin yaduwa daga mutum zuwa mutum ta hanyar shakar numfashi, da duk wani ruwa daga jikin mai cutar, ha hanyar kusanci da shi.
Kwamishinan ya ce jihar Filato na fuskantar matsaloli wajen tabbatar da wadanda ake zargin sun kamu da cutar ne saboda rashin wadatattun wassu muhimman kayan aiki na musamman da ake bukata domin karbar samfuri zuwa dakunan gwaje-gwaje.
“Ya zuwa yanzu, muna da mutane 143 da ake zargin sun kamu da cutar, an kuma kashe mutane 23 a halin yanzu, tara a asibitin koyarwa na Jami’ar Jos, JUTH, da kuma asibitin kwararru na Filato, Jos,” in ji Baamlong.
Ya kara da cewa, babban kalubalen da ma’aikatar ke fuskanta biyo bayan bullar cutar sun hada da yadda wadanda suka kamu da cutar ke zuwa a makare da kuma samun maganin kashe kwayoyin cuta, domin cutar diphtheria na iya yaduwa cikin sauri ta hanyar saduwa, tari, atishawa da kusanci.
“Muna fuskantar kalubale game da cutar saboda ya kamata a tattara samfurin a cikin akwati na musamman domin mu aika don tabbatarwa, amma ba mu da irin wannan kwantena,” in ji shi.
Kwamishinan ya kuma bayar da tabbacin cewa gwamnatin jihar ta kara kaimi wajen wayar da kan jama’a a matakin al’umma, tare da baiwa sarakunan gargajiya da sauran masu ruwa da tsaki su wayar da kan jama’a game da cutar da kuma hanyoyin hana yaduwarta.
“Ya zuwa yanzu mun kaddamar da yakin wayar da kan al’umma ta hanyar sarakunan gargajiya da sauran masu ruwa da tsaki don dakile yaduwar,” in ji Baamlong.
