Farashin danyen mai ya fadi da kusan kashi daya a ranar talata, bayan da ministan harkokin wajen Iran yace Amurka da Farisan sun amince akan sharuddan da za su mutunta a tattaunawar da suke yi kan shirin Nukuliyar kasar, mataki da ya rage fargabar da ‘yan kasuwa suke yi game da karuwar zaman dar dar.
Mai da ake kira Brent yayi kasa da kusan dala daya, ya tsaya kan dala 67. da centi 71 akan ko wace ganga, bayan da ya tashi da kamar kashi 1.33 a ranar litinin.
Yayinda mai da ake kira West Texas ana sayen ko wace gangar mai akan dala 62 da centi 79 ya fadi da kamar centi 10, wannan farashi ya shafi dukkanin hada hadar da akayi ranar Litinin, wadda ba’a cimma daidaito akanta ba, saboda ranar hutu ne a Amurka.
Galibin manyan kasuwannnin sayen hannayen jari a Asiya suna hutu ranar talata na sabuwar shekarar su da suka hada da China, da Hong Kong, da Taiwan, da Korea ta kudu da Singapore.
Ministan harkokin wajen na Iran Abbas Araqchi ya fadawa wata kafar yada labaran kasar cewa, ci gaba da aka samu a wajen tattaunawar ba yana nufin za’a sami saukin kulla yarjejeniya ba, sai dai hakan yana nuni da cewa an kama hanyar samun ci gaba ne a shawarwarin.
Farashin mai zai ci gaba da kasancewa cikin rashin tabbas saboda batutuwa na Diflomasiyyar ne suke tasiri, maimakon bukata, inji Sugandha Sachdeva, mai kamfanin SS a New Delhi.
