Gwamnatin Tarayyar Najeriya ta bayyana cewa ta aiwatar da manyan sauye-sauye a fannin fansho cikin shekaru biyu da suka gabata, inda ta kashe Naira biliyan 758 wajen biyan basussukan haƙƙoƙin fansho da suka taru tun daga shekarar 2007, tare da ƙara kuɗaɗen da masu ritaya ke karɓa a kowane wata.
Darakta Janar ta Hukumar Kula da Fansho ta Ƙasa (PenCom), Misis Omolola Oloworaran, ce ta bayyana hakan yayin wani taron manema labarai da aka gudanar a Fadar Shugaban Ƙasa da ke Abuja ranar Talata.
A cewarta, matakin ya amfani kusan masu ritaya 957,045, tare da rage gibin biyan haƙƙoƙin fansho daga jinkirin watanni 21 zuwa yanayin da gwamnati ke da tanadin kuɗin biyan fansho na watanni 41 a gaba.
Ta ce jimillar kuɗaɗen da ke cikin tsarin fansho ta haura daga Naira tiriliyan 20.79 zuwa Naira tiriliyan 31.48 cikin shekaru biyu, abin da ta ce ya nuna ƙaruwar amincewar ma’aikata da tsarin, yayin da sabbin ma’aikata sama da 938,000 suka shiga tsarin fansho a wannan lokaci.
Omolola ta kuma bayyana cewa gwamnati ta ƙaddamar da shirin Pension Boost 1.0, wanda ya ƙara jimillar kuɗin fansho da ake biya a kowane wata daga Naira biliyan 12.2 zuwa Naira biliyan 14.9.
Haka kuma, ta ce gwamnatin ta amince da ƙarin Naira 32,000 ga dukkan masu ritayar ma’aikatan gwamnatin tarayya da suka yi ritaya kafin 29 ga Yulin 2024, domin daidaita kuɗin fanshonsu da sabon mafi ƙarancin albashi.
