Hukumar Samar da albarkatun Ruwa ta jihar Gombe, ƙarƙashin shirin NG-SURWASH, ta gudanar da horo ga ma’aikatan Sashen Ayyukan Kasuwanci na hukumar kan Ka’idojin Gudanar da Aiki (Standard Operating Procedures – SOPs).
An gudanar da horon ne da nufin inganta hanyoyin tattara kuɗaɗen shiga, kyautata hulɗa da masu amfani da ruwa, da kuma inganta yadda ake gudanar da ayyukan samar da ruwan sha a jihar.
Horon ya mayar da hankali kan muhimman fannoni na harkokin kasuwanci, ciki har da tattara kuɗaɗen shiga da miƙa su, tsara kuɗin ruwa da rarraba takardun biyan kuɗi, karɓa da magance koke-koken masu amfani da ruwa, da kuma hanyoyin katsewa da dawo da samar da ruwa.
Da yake magana kan muhimmancin horon, Mai Gudanar da Shirin NG-SURWASH, Injiniya Usman A. Aliyu, ya jaddada buƙatar ma’aikatan su fahimci tare da bin ka’idojin aiki da aka amince da su.
Injiniya Aliyu ya bayyana cewa bin SOPs yadda ya kamata zai taimaka wajen ƙara gaskiya, rikon amana da ingancin ayyukan Hukumar Ruwa.
Ya ce ƙarfafa ƙwarewar ma’aikatan Sashen Ayyukan Kasuwanci na da muhimmiyar rawa wajen tabbatar da ɗorewar tattara kuɗaɗen shiga da inganta hidimar samar da ruwa ga al’umma.
Shi ma Babban Manajan Hukumar Ruwa ta Jihar Gombe, Injiniya Abubakar Sadiq, ya yaba wa shirin NG-SURWASH saboda tallafa wa hukumar wajen ƙarfafa ƙwarewar ma’aikatanta.
Injiniya Sadiq ya buƙaci mahalarta horon da su kasance masu ƙwazo wajen koyon abubuwan da ake koyarwa tare da amfani da ilimin da suka samu wajen gudanar da ayyukansu na yau da kullum.
Ya ce ingantaccen lissafin kuɗin ruwa, rarraba takardun biyan kuɗi a kan lokaci, sauraron koke-koken masu amfani da ruwa da kuma gaskiya wajen tattara da miƙa kuɗaɗen shiga, na da matuƙar muhimmanci wajen ƙara amincewar jama’a da tabbatar da ɗorewar ayyukan samar da ruwa.
Babban Manajan ya kuma ƙarfafa gwiwar ma’aikatan da su yi amfani da horon wajen inganta ƙwarewarsu da kuma bayar da gudunmawa wajen sauye-sauyen da ake aiwatarwa domin bunƙasa Hukumar Ruwa ta Jihar Gombe.
Horon ya bai wa mahalarta damar samun ilimi da ƙwarewar aikace-aikace kan yadda za su aiwatar da ka’idojin aiki daban-daban, tare da mai da hankali kan ƙwarewa, rikon amana, gamsar da masu amfani da ruwa da inganta ayyukan hukumar.
Shirin na daga cikin ƙoƙarin NG-SURWASH da Hukumar Ruwa ta Jihar Gombe na ƙarfafa ƙarfin hukumomi da tabbatar da samar da ingantaccen ruwan sha cikin ɗorewa, inganci da rikon amana a faɗin jihar.
