Shugaba Donald Trump yace Amurka zata kai farmaki mai tsanani kan Iran “makon da yake zuwa,” jim kadan bayan da ya dage takunkumi kan sayen mai daga Rasha na tsawon kwanaki 30, da nufin saukaka farashin mai da yayi tashin goron zabbi, sakamakon hare-haren hadin guiwar da Amurka da Isra’ila suka kaddamr kan Iran.
Farashin mai yana kwan gaba kon baya kan canjin kalaman shugaba Trump game da tsawon lokaci da zai dauka a kammala wannan yaki, wadda yasa Iran take kai hare hare kan jiragen ruwa a mashigin ruwan Hormuz, hanyar da ake bi da kashi 1 cikin biyar na mai da duniya take amfani dashi.
A baya shugaba Trump yace “an gama yakin,” ya kuma yi alkawarin baiwa jiragen ruwan kariya a mashigin ruwan Hormuz. A hira da yayi da tashar talabijin ta FOX da tashar ta nuna jumma’an nan , Trump yace Amurka zata raka jiragen ruwan da za su bi ta mishigin ruwan “idan muka buka ci yin haka.”
Farashin mai da ake kira Brent ya sauka zuwa dala 99. da centi 80, wadda har yanzu yake nuna farashin man ya karu da kamar kashi 40 cikin dari tun fara wannan yaki.
Ahalinda ake ciki kuma jani-injaka ya turnuke a fadar White House tsakanin hadiman shugaba Trump ta hanyar da Amurka zata ayyana nasara a yaki kan Iran yayinda rikicin yake kara bazuwa a fadin gabas ta tsakiya, ganin babu wata mafita kai tsaye da Amurka zata bi ta tsaida fadan.
