A yau Litinin ake sa ran cewa shugaba Volodymyr Zelensky na Ukraine zai rattaba hannu kan wasu yarjejeniyoyi da Faransa da nufin samarwa kasarsa makaman kare kai daga hare-hare ta sama, tare da ba ta jiragen yaki da makamai masu linzami.
Zelensky yana birnin Paris a yanzu haka domin tattaunawa da shugaba Emmanuel Macron, a yayin da kasar Rasha ta zafafa hare-hare da jiragen drone tare da makamai masu linzami cikin ‘yan makonnin nan a kan sassan Ukraine, kuma a dai-dai lokacin da hukumomi a birnin Moscow suka ce dakarunsu sun samu ci gaba a yunkurin kutsawa sosai cikin yankin Zapizhzhia ta kudu maso gabashin Ukraine.
