Lebanon ta ce zata kai karar Isra’ila gaban Kwamitin Sulhu na Majalisar Dinkin Duniya, a saboda wata katangar da ta gina ta kankare a bakin iyakar kudancin Lebanon, wadda ta tsallake bakin iyakar da majalisar ta shata dake raba tsakanin kasashen biyu.
Wannan iyakar da ake yi ma lakabi da Shudin Layi, MDD ce ta tsara shi domin raba tsakanin Lebanon da Isra’ila, da kuma Tuddan Golan na kasar Sham wadanda Isra’ila ta mamaye. Sojojin Isra’ila sun ja, suka koma bayan wannan layin a shekarar 2000 lokacin da suka janye daga kudancin Lebanon.
Wani kakakin babban sakataren MDD, Stephane Dujarric, yace wannan katanga ta Isra’ila ta sa wasu ‘yan kasar Lebanon ba su iya shiga wasu sassan yankunansu ba.
Ofishin shugaban Lebanon ya nanata wannan a lokacin da yake ci gaba da gina wannan katanga da Isra’ila keyi ya sabawa kuduri na 1701 na Kwamitin Sulhun MDD kuma ya keta haddin diyaucin kasar Lebanon,
A ranar Jumma’a, wani kakakin rundunar sojojin bani Isra’ila, ya musanta cewa wannan katanga da ake ginawa ta tsallake wannan layi da aka shata na iyaka.
