Shugaban Rasha Vladimir Putin ya fara shawarwari da wakilai ko jakadun Amurka uku a daren Alhamis da nufin kawo karshen yakin da kasar take yi da Ukraine, kamar yadda fadar Kremlin ta bayyana.
Wakilin Amurka na musamman Steve Whitkoff, da Jared Kushner surkin shugaba Trump, da Josh Gruenbaum, wanda bada dadewa ba shugaba Trump ya nada a zaman sabon mai bashi shawara a kwamitin wanzar da zaman lafiya da shugaba Trump ya kafa da burin kawo karshen fitintinu a duniya.
Shugaba Putin ya karbi bakuncin jami’an na Amurka jim kadan kamin karfe 12 na dare agogon Moscow, bayan da shugaba Trump yace an kusa cimma yarjejeniyar kawo karshen yakin, shi kuma Steve Whitkoff yace yanzu abu daya ne har yanzu ba’a warware ba a shawarwarin da ake yi na kawo karshen yakin.
Ahalinda ake ciki kuma, dakarun Rasha sun kaddamar da wani hari kan wasu kauyuka biyu a Ukraine, mutum daya ya halaka, wasu 20 kuma suka jikkata.
