Ministan harkokin wajen Guinea Bissau ya ce gwamnatin kasar ta tsaida binciken kiwon lafiya da gwamnatin Donald Trump ta dauki nauyinsa, da nufin auna tasirin da kuma abunda ka iya faruwa da wadanda aka yi wa allurar rigakafin shawara ko hepatitis B da turanci, da kuma yadda hakan yake kuma shafar wadanda suke fama da larurar setin kwakwalwa ko autism da turanci.
Guinea Bissau daya daga cikin kasashe matalauta a Afrika ta yamma, ‘yan kasar masu yawa suke da shawara. Sai dai binciken ya janyo suka matuka daga masana kimiyya, kungiyoyin kiwon lafiya na kasa da kasa, har ma shugaban hukumar kiwon lafiya na duniya Tedres Ghebereysus ya soki shirin da za’a bada allurar riga kafin ga rabin yara da aka haifa.
A cikin watan jiya ne Guinea Bissau ta dakatar da shirin sai bayan an sake nazari. Masu sukar lamirin shirin suka ce ana gwaje gwajen ne da nufin alakanta alllurar riga kafi da larurrar setin kwakwalwa, da ministan kiwon lafiya na Amurka Robert F. Kennedy karami, yake ta yayatawa, amma kuma masana kimiyya suka musanta matsayar da yake dauka.
Ministan harkokin wajen Guinea Bissau Jao Bernado Viera ya fada a hira da aka yi dashi a ranar talata cewa an rufe shirin, yace kwararru a tafarkin kimiyya da kuma senatocin Amurka sun soki lamirnsa.
