‘Yan sandan birnin New York a Amurka sun ce wani abu da aka dana, aka kuma jefa shi lokacin zanga-zanga a kofar gidan magajin garin birnin a karshen makon nan, bam ne wanda yana iya kisa ko janyo mummunan rauni.
Wannan bam, an hada shi ne cikin wata jarka da aka cika da kusoshi da sukuru (screw), aka daure da bakin tabe, sannan aka sanya masa kunamar harbawa.
‘Yan sanda suka ce an ci sa’a, wutar da aka sanya a jikin kunamar ba ta kai ga inda bam din ke kunshe ba sai ta mutu.
Kwamishinar ‘yan sandan New York, Jessica Tisch, ta ce an damke mutane biyu suna da hannu game da wannan lamarin.
Wannan bam din yana daya daga cikin biyu da aka jefa lokacin da wani dan ra’ayin rikau mai suna Jake Lang da magoya bayansa su kimanin 20 suke yin zanga zanga a kofar gidan Mamdani, kan abinda suka kira yunkurin kwace New York da Musulmi ke yi, da kuma yadda Musulmi ke sallah a bainar jama’a cikin birnin.
Wasu mutanen da suka ninka wancan kusan sau goma su kuma sun yi zanga-zangar nuna goyon bayan magajin garin na New York.
A wata sanarwar da ya bayar jiya lahadi, Mamdani yayi tur da zanga-zangar Lang da magoya bayansa, amma kuma yace tashin hankalin da aka so aikatawa daga bisani ya fi tayar da hankali.
Yace yunkurin yin amfani da bam domin jikkata wasu mutane, babban laifi ne kuma abin kyama da ya saba ma duk wata akida ko dabi’a da suka sani.
