A wani gagarumin mataki na zamanantar da aikin dan sanda da rage radadin tsadar man fetur, Gwamnatin Tarayyar Najeriya ta mika wa Rundunar ’Yan Sandan Najeriya (NPF) wasu manyan motocin bas guda uku masu amfani da iskar gas (CNG).
Wannan tallafi, wanda ya fito ne ta hannun Asusun Tallafawa ’Yan Sanda (NPF-TF) da kuma Kwamitin Shugaban Kasa kan Motocin Gas da Lantarki (PI-CNG & EV), an mika shi ne a ranar Laraba a helkwatar rundunar da ke Abuja.
Sufeto Janar na ’Yan Sanda, IGP Olatunji Rilwan Disu, ya bayyana jin dadinsa ga wannan hangen nesa na gwamnatin Shugaba Bola Ahmed Tinubu.
Ya bayyana cewa, Wannan canji zuwa amfani da makamashin gas da lantarki wani muhimmin mataki ne da zai sanya aikin dan sandan Najeriya ya tafi daidai da yadda ake yi a kasashen da suka ci gaba.
“Za a yi amfani da wadannan motoci ne domin inganta walwalar jami’ai da kuma saukaka zirga-zirgarsu yayin gudanar da ayyukan tsaro.” Inji shi.
Rundunar tana shirin samar da cibiyoyin canza fasalin motoci (conversion centres) a cikin gida domin su rika gyara da kuma kula da motocin da kansu.
Shugabannin hukumomin biyu, a karkashin jagorancin Sakataren NPF-TF, Mohammad Sheidu, da Shugaban PI-CNG & EV, Barista Ismail Ahmed (OON), sun tabbatar da cewa wannan somin-tabi ne.
“Wannan mataki na daya ne daga cikin babban shirin Gwamnatin Tarayya na sauya fasalin dukkan motocin aiki na ’yan sanda zuwa masu amfani da iskar gas (CNG). Wannan zai rage kudin da ake kashewa wajen sayen man fetur da kusan kashi 50% ko fiye da hakan.”
Taron ya samu halartar manyan jami’ai daga hukumomin biyu, ciki har da CP Tony Emafale, Alhaji Sanusi Aliyu, da sauran wakilai daga bangaren kwamitin CNG na fadar shugaban kasa.
Wannan hadin gwiwa wata hujja ce dake nuna yadda Gwamnatin Tarayya take jajircewa wajen samar da ingantattun kayan aiki ga hukumomin tsaro ta hanyar amfani da fasahar zamani mai rahusa kuma marar illa ga muhalli.
Matakin zai kara wa rundunar karsashi wajen kare rayuka da dukiyoyin ’yan Najeriya a wannan sabon zamani.
