Jihar Gombe ta sake kafa tarihi a fannin tsaro, bayan Gwamna Muhammadu Inuwa Yahaya, wanda Mataimakinsa Dakta Manassah Daniel Jatau ya wakilta, ya kaddamar da wata cibiyar tsaro ta dijital ta zamani, tare da sabon ofishin ’yan sanda da gidajen kwana na zamani ga jami’an tsaro.
An gudanar da wannan muhimmin bikin ne a Hedikwatar Rundunar ’Yan Sanda ta Shalkwatar Gombe da ke kan titin Fadar Sarkin Gombe, a ranar Laraba, 10 ga watan Yunin 2026.
Wannan aiki, wanda aka bayyana a matsayin na farko irinsa a Najeriya, ya fito ne daga haɗin gwiwa tsakanin Galaxy Backbone, Asusun Tallafawa Rundunar ’Yan Sandan Najeriya (Nigeria Police Trust Fund), da Rundunar ’Yan Sanda ta Najeriya, domin inganta tsaro ta hanyar amfani da fasahar zamani da na’urorin sa ido na dijital.
Jami’ai sun bayyana cewa sabon tsarin zai taimaka wajen gano laifuka cikin gaggawa, hana aikata su tun kafin su faru, da kuma inganta martani ga matsalolin tsaro ta hanyar amfani da fasahar zamani da ke bin ƙa’idojin aikin ’yan sanda na duniya.
A gefe guda kuma, an gina sabbin gidajen kwana guda hudu na jami’an ’yan sanda masu ƙananan mukamai, domin inganta walwala da ƙara ingancin aikin jami’an tsaro a jihar.
Da suke zantawa da manema labarai, Shugaban PCRC na jihar, Comrade Garba Ubale, da Sakataren Jama’atu Nasril Islam (JNI), Alhaji Saleh Danburam, sun yaba da wannan ci gaba, suna cewa zai ƙara ƙarfafa dangantaka tsakanin ’yan sanda da al’umma, tare da inganta tsaron jama’a.
Haka kuma, Kwamishinan ’Yan Sandan jihar Gombe, CP Ahmed Chuso, ya samu yabo bisa jajircewa da ƙoƙari wajen kyautata alaƙar rundunar da jama’a da kuma inganta ayyukan tsaro.
Wannan mataki ya jawo hankalin masu bibiyar lamuran tsaro a ciki da wajen Najeriya, inda ake ganin Gombe na zama ɗaya daga cikin jihohin da ke jagorantar amfani da fasahar zamani wajen tabbatar da tsaro mai ɗorewa.
