Rundunar ’Yan Sandan jihar Bauchi ta tabbatar da kama wasu mutane biyu da ake zargi da hannu a wasu munanan laifuka guda biyu da suka faru a ƙananan hukumomin Katagum da Itas/Gadau.
A cewar sanarwar da Kakakin Rundunar ’Yan Sandan jihar SP Nafiu Habib, ya fitar a ranar 25 ga Satumba, 2026, lamarin farko ya faru a yankin Zirami da ke Azare.
Rundunar ta ce a ranar 24 ga Satumba, wata mata mai shekaru 20 ta kai jaririyarta mai wata huɗu, Fatimah Muhammad, zuwa Ofishin ’Yan Sandan Azare bayan ta same ta ba ta numfashi.
Matar ta bayyana cewa ta bar jaririyar tana barci a gida yayin da ta je gidan maƙwabcinta domin gyaran gashi. Bayan ta dawo, ta ce ta tarar da mijinta, Muhammad Garba Ladan mai shekaru 27, yana fitowa daga ɗakin.
Rundunar ta ce matar ta kuma yi zargin cewa mijin nata ya taɓa ƙoƙarin cutar da jaririyar a baya.
Bayan samun rahoton, jami’an ’yan sanda sun garzaya da jaririyar zuwa Babban Asibitin Azare, inda likita ya tabbatar da rasuwarta sakamakon shaƙewa, kamar yadda sanarwar rundunar ta bayyana.
AN KAMA WANDA AKE ZARGIN, KUMA ANA CI GABA DA GUDANAR DA BINCIKE.
An Kama Wani Kan Zargin Kashe Mace Bisa Zargin Maƙarƙashiyar Boka
A wani lamari makamancin haka, rundunar ta ce ta kama wani matashi mai shekaru 25, Haruna Amadu, bisa zargin shiga gidan wata mata mai shekaru 60, Hafsatu Ya’u, a ƙauyen Wasari da ke Gadau District.
Rundunar ta ce wanda ake zargin ya kai wa matar hari bayan ya zarge ta da hannu wajen rashin lafiyar wata mata mai suna Maryam Amadu, wadda ke fama da rashin lafiya.
An garzaya da Hafsatu zuwa Babban Asibitin Azare domin samun kulawar gaggawa, amma likita ya tabbatar da rasuwarta.
Rundunar ta tabbatar da kama wanda ake zargin, yayin da ake ci gaba da gudanar da bincike kan lamarin.
Rundunar ’Yan Sandan jihar Bauchi ta ce za a tura duka shari’o’in zuwa Sashen Binciken Manyan Laifuka na Jiha (SCID) da ke Bauchi domin gudanar da cikakken bincike.
Kwamishinan ’Yan Sandan jihar Bauchi, CP Sani-Omolori Aliyu, ya yi Allah-wadai da ɗaukar doka a hannu, kisan da ake dangantawa da zargin maƙarƙashiyar bokanci, da kuma cin zarafin mata da yara.
Ya kuma yi kira ga jama’a da su guji ɗaukar doka a hannunsu, tare da kai rahotannin laifuka ga hukumomin tsaro domin ɗaukar matakin da ya dace.
