Sarkin Jaurowal dake Masarautar Pindiga, Karamar Hukumar Akko ta Jihar Gombe, Comrade Ambassador Ibrahim Mu’azu Hassan, ya roƙi gwamnatoci a dukkan matakai su samar da muhimman kayan more rayuwa ga al’ummar da ke ƙarƙashinsa.
Yayin da yake Tattaunawa da Wakilin Amurka Ke Magana a jihar Gombe, sarkin ya roƙi shugabannin siyasa, masu hannu da shuni, da kuma ƙungiyoyi masu zaman kansu su tallafawa yankin ta hanyar sauƙaƙa samar da Hanyoyi, Cibiyoyin lafiya, da Makarantun ilimi.
Mu’azu Hassan ya bayyana damuwarsa kan halin da ababen more rayuwa ke ciki a yankin, musamman hanyoyi, wanda ya ce ya haddasa mutuwar akalla mata 5 da ba su samu damar samun magani a kan lokaci ba yayin da ake ɗaukarsu zuwa asibiti.
Ya yi kira ga gwamnatin Gwamna Alhaji Muhammadu Inuwa Yahaya, Sanata Danjuma Goje mai wakiltar Gombe ta Tsakiya, da Dr. Usman Bello Kumo ɗan majalisar tarayya mai wakiltar Akko, Alhaji Abubakar Abdullahi Mai Wanka dan majalisa mai wakiltar Akko ta Yamma dasu shiga tsakani su magance matsalolin da al’ummar yankin ke fuskanta.
Sarkin ya kuma yi ƙorafi kan watsar da aikin gina Makarantar Junior Secondary School ta Jaurowal da aka shirya yinta kuma basuyi ba har yau, inda ya ce ginin ya tsaya shekaru 7 da suka wuce, ya kuma ƙara da cewa mazauna yankin suna fama da matsaloli wajen samun ingantaccen ilimi da lafiya.
Ya kara roƙon gwamnati ta ba yankin kulawa, ta kuma ƙirƙiri “Ward” saboda Jaurowal yana da kauyuka kusan 10, ciki har da Garin Jauro Jibir, Labarfito, Dongoru Karama, Felawa, Bakkiti, Pali, Lafiyawo, da Ardowu,Garin Yabano etc.
Duk da yawan jama’a da gudummawar da suke bayarwa ga karamar hukumar, ya ce al’ummar yankin ba su ci moriyar ayyukan ci gaba da ‘ya’yan dimokuraɗiyya ba har yanzu.
Mu’azu Hassan ya roƙi hukumomi masu dacewa su ba da fifiko ga bukatun yankin, su inganta rayuwar mazauna yankin ta hanyar samar da ababen more rayuwa da ayyukan cigaban al’umma.
A karshe yana addu’a ga kasar Pindiga Emirates da Garin Jaurowal jihar Gombe da Nigerian baki daya da Allah yabasu zaman lfy da cigaba mai dorewa.
