Shugaban Hukumar Kula da Wutar Lantarki ta jihar Gombe (GoSERC), tare da sauran Kwamishinoni biyar na hukumar, sun gana da Daraktan Gudanarwa mai kula da Hanyoyin Rarraba Wutar Lantarki na Kamfanin Niger Delta Power Holding Company (NDPHC), Injiniya Bello Babayo Bello, da Daraktan Gudanarwa mai kula da Harkokin Shari’a, Dr. Steven Andzenge, a ofisoshinsu da ke Abuja a Najeriya
Ganawar ta kasance wani bangare na ziyarar aiki da hukumar GoSERC ta kai, domin lalubo hanyoyin tabbatar da samar da wutar lantarki mai dorewa da kuma inganta ayyukan samar da wutar lantarki a jihar Gombe.
Taron ya mayar da hankali ne kan batutuwan da suka shafi kula da harkokin wutar lantarki, da dabarun inganta samar da wutar lantarki da kuma yadda za a inganta ayyukan da ake bai wa al’ummar jihar.
Jami’an NDPHC din biyu sun bayyana aniyarsu ta yin hadin gwiwa da GoSERC wajen inganta samar da wutar lantarki da kuma tallafa wa ci gaba mai dorewa a fannin wutar lantarki a jihar Gombe.
Sun kuma jaddada muhimmancin hadin gwiwa tsakanin hukumomi da sauran masu ruwa da tsaki wajen magance kalubalen da ke addabar bangaren wutar lantarki, da kuma inganta samun ingantacciyar wutar lantarki mai dorewa ga al’ummar Jihar Gombe.
Ya kamata a tuna cewa gwamnatin jihar Gombe ta kafa Hukumar Kula da Wutar Lantarki ta Jihar Gombe (GoSERC) domin karfafa ikon jihar na tsara da kuma sa ido kan harkokin wutar lantarki, tare da tallafa wa aiwatar da sauye-sauyen kasuwar wutar lantarki a matakin jiha.
NDPHC ta yaba wa Gwamnan jihar Gombe, Muhammadu Inuwa Yahaya, bisa nada kwararru masu kwarewa da jajircewa wajen tafiyar da harkokin hukumar, musamman wadanda ke da masaniya kan samar da wutar lantarki da sauye-sauyen da ake samu a fannin.
Kamfanin ya bayyana kwarin gwiwar cewa jihar Gombe za ta kasance cikin jihohin da za su yi takara da sauran jihohin Najeriya wajen jawo jarin da zai bunkasa bangaren wutar lantarki da sauran harkokin ci gaba.
NDPHC ta kuma yi alkawarin ba jihar Gombe dukkan goyon bayan da ake bukata domin cimma manufofinta na inganta samar da wutar lantarki da kuma bunkasa jarin da ake zubawa a fannin.
