Hukumar Raya Arewa maso Gabashin Najeriya (NEDC) ta yi alkawarin ci gaba da sanya ido da kuma tallafa wa mata 280 da suka samu horo a karkashin shirin “Pads to Prosperity Community Pad-Making Enterprise Programme” a Jihar Gombe.
Mai Kula da ayyukan NEDC a Jihar Gombe, Architect Usman Muhammad, ne ya bayyana hakan a wajen bikin rufe shirin horaswar da aka gudanar a Gombe.
Ya ce hukumar ta himmatu wajen inganta rayuwar al’ummar yankin Arewa maso Gabas ta hanyar samar da shirye-shiryen da za su bunkasa kwarewa, samar da ayyukan yi da kuma dogaro da kai.
Architect Usman ya yaba wa mahalarta shirin bisa jajircewa da hadin kan da suka nuna a lokacin horaswar, inda ya bayyana cewa an zabo mahalarta daga kananan hukumomin Dukku, Funakaye, Gombe da Yamaltu Deba a matsayin wuraren gwajin shirin.
Ya bukaci wadanda suka amfana da horon da su yi amfani da ilimin da suka samu wajen kafa kananan sana’o’i da za su taimaka wajen inganta rayuwarsu da ta al’ummominsu.
Shi ma da yake magana, Rufai Lawan Baba Manu, ya ce za a rika bibiyar shirin na tsawon watanni shida tare da hadin gwiwar wasu kungiyoyi, domin tabbatar da cewa mahalarta sun samu damar mayar da kwarewar da suka koya zuwa sana’o’i masu dorewa.
Ya ce shirin na da manufar gina lafiya, samar da arziki da sauya rayuwar al’umma, musamman ta hanyar bai wa mata damar samun sana’a da dogaro da kai.
Rufai Baba Manu ya kuma yaba wa mahalarta bisa kyakkyawan hali, jajircewa da ladabtarwa da suka nuna, tare da tabbatar musu da cewa NEDC za ta ci gaba da ba su goyon baya da hadin kai.
A sakonnin fatan alheri, Hajiya Fatima Umar Abubakar daga Ma’aikatar Harkokin Mata ta jihar Gombe, Dr. Gazali Abdulhamid, Shugaban kwalejin Ilimi ta Tarayya a Gombe, Malam Ibrahim Yusuf na kungiyoyin farar hula, da Hajiya Maimuna Abubakar ta Hukumar Wayar da Kan Jama’a ta Kasa (NOA), Gombe, da sauran masu ruwa da tsaki, sun yaba wa NEDC kan kokarin da take yi wajen sauya rayuwar al’umma ta hanyar samar da sana’o’i da dabarun dogaro da kai.
Sun ce irin wadannan shirye-shirye na taimakawa wajen rage radadin matsin tattalin arziki da samar da hanyoyin samun kudin shiga ga iyalai.
Sun kuma bukaci wadanda suka kammala horon da su zama masu horas da wasu (Training of Trainers), domin su yada ilimin da suka samu ga matasa da sauran al’umma, musamman a yankunansu.
Shirin Pads to Prosperity wanda NEDC ta dauki nauyin gudanarwa, tare da hadin gwiwar Virtuous Reusable Pads, ya mayar da hankali kan inganta lafiyar mata, samar da arziki da kuma sauya al’umma ta hanyar koyar da sana’ar kera kayan tsaftar mata da bunkasa kananan sana’o’i.
