Wasu sabbin hotunan bidiyo sun nuna abinda wasu kwararru suka bayyana a zaman wani makami mai linzami samfurin Tomahawk na Amurka yana fadawa dab da wata makarantar yara mata inda aka kashe yara fiye da 165 a farkon yakin da aka kai kan Iran.
Wannan yana zuwa ne a yayin da ake kara samun shaidar cewa lallai Amurka ce ta kai harin da yayi sanadiyyar kashe wadannan dalibai mata yara a makarantarsu dake Minab a lardin Hormozgan na kudancin kasar.
Wani jami’in Amurka dake da masaniya game da tattaunawar dake wakana a tsakanin shugabannin Amurka ya fadawa kamfanin dillancin labarai na AP cewa a bisa dukkan alamu Amurka ce ta kai harin da ya fada kan makarantar.
Sabbin hotunan bidiyon da aka dauka a ranar da aka kai hari kan makarantar, wata kungiyar bincike mai suna Bellingcat ce ta fara nazarinsa, kuma a ranar lahadi kamfanin dillancin labaran Mehr na kasar Iran ya yada shi. Hotunan sun nuna makami mai linzami yana fadawa a kan makarantar.
Kamfanin dillancin labaran AP ma yayi nazarin hoton bidiyon ya kuma samu shaidar cewa lallai an dauka ne daga wani gini dake gefen wannan makaranta.
Wani mai bincike na Bellingcat, Trevor Ball, ya ce wannan makami mai linzami lallai samfurin Tomahawk ne, wanda Amurka ce kadai aka san tana da shi a wannan yakin. Wannan kuma ita ce shaidar farko ta irin makamin da aka yi amfani da shi a kan makarantar ta yara dalibai mata.
