Shugaban Ƙasar Najeriya, Bola Ahmed Tinubu, ya kaddamar da kwamitin yakin neman zabensa na jam’iyyar APC gabanin babban zaben 2027, inda ya bukaci shugabannin jam’iyyar da mambobin kwamitin su hada kai, su kasance masu jajircewa da kuma mayar da hankali wajen ganin an sake zaben sa karo na biyu. Tinubu ya bayyana hakan ne yayin bikin kaddamar da kwamitin a Cibiyar Taro ta Fadar Shugaban Kasa da ke Abuja, inda ya ce APC a shirye take ta sabunta alkawarinta da ‘yan Najeriya.
Shugaban ya ce nasarar zaben da ya gabata ba za ta wadatar ba har sai jam’iyyar ta sake samun nasara a zaben 2027, yana mai cewa dole ne shugabanni da masu ruwa da tsaki su tabbatar da samun kuri’u a mazabu, kananan hukumomi da jihohinsu.
Ya kuma jaddada cewa, duk da yadda kwamitin zai kara kaimi wajen wayar da kan jama’a da neman goyon baya, gwamnatinsa za ta ci gaba da gudanar da ayyukan mulki da kuma aiwatar da manufofin ajandar Renewed Hope.
Mataimakin shugaban kasa, Kashim Shettima, ya yaba da jajircewar Tinubu wajen zurfafa dimokuradiyya, yayin da ya soki tsohon mataimakin shugaban kasa Atiku Abubakar kan kalaman da ya ce suna rage martabar ofishin shugaban kasa. Shettima ya kuma soki dan takarar shugaban kasa na NDC, Peter Obi, bisa zargin amfani da alkaluma marasa inganci da kuma kwatanta Najeriya da wasu kasashe ba tare da la’akari da bambancin yanayinsu ba.
A nasa bangaren, shugaban APC na kasa, Farfesa Nentawe Yilwatda, ya ce kwamitin zai gudanar da yakin neman zabe daga mazabu zuwa jihohi, tare da bayyana nasarorin gwamnati da manufofinta ga jama’a.
Gwamnan Imo kuma shugaban kungiyar gwamnonin APC, Hope Uzodimma, ya ce manufofin gwamnatin Tinubu za su taimaka wajen saukaka aikin yakin neman zaben, yana mai yabawa shugaban kan cire tallafin man fetur da sauye-sauyen tsarin musayar kudaden waje da haraji.
Ya ce wadannan matakai sun taimaka wajen bunkasar tattalin arzikin Najeriya zuwa kashi 4.43 cikin 100, daga kashi 4.23 cikin 100 a shekarar da ta gabata, duk da cewa sun jawo wasu matsaloli ga jama’a. Uzodimma ya ce yakin neman zaben zai mayar da hankali kan manufofi da nasarorin da aka samu.
Gwamnan Osun, Ademola Adeleke, Gwamnan Anambra, Charles Soludo, da Ministan Babban Birnin Tarayya Abuja, Nyesom Wike, sun bayyana goyon bayansu ga sake zaben Tinubu a 2027. Wike, wanda ya fito daga PDP, ya ce yana goyon bayan shugaban ne saboda jajircewarsa wajen fuskantar matsalolin da gwamnatocin baya suka kasa magancewa.
Shugaban Majalisar Dattawa, Godswill Akpabio, Kakakin Majalisar Wakilai, Tajudeen Abbas, da wasu manyan jiga-jigan kasa su ma sun bukaci ‘yan Najeriya su marawa Tinubu baya domin ya kammala ayyukan da ya fara.
