Masu fashin baki sun ce amincewar da aka yi da fara sayar da wani maganin rage kiba da rage jin yunwa wanda za a fara sayarwa a nan Amurka cikin watan Janairu mai zuwa, zai tilasta ma kamfanonin sarrafa abinci da gidajen sayar da abinci baki daya sauya irin abubuwan da zasu iya sayarwa da jama’a.
Da ma akwai wannan magani da ake yin allurarsa, amma wannan shine karon farko da aka amince da sayar da shi a zaman kwayar da mutum zai iya hadiya kuma masana suka ce ana sa ran miliyoyin Amurkawa zasu sayi kwayar maganin maimakon allurar a saboda ya fi araha, kuma zai fi dadin amfani maimakon yi ma kai allura a kullum.
A ranar litinin ne Hukumar Kula da Tsarin Abinci da Magunguna ta Amurka ta amince da wannan magani mai suna WEGOVY GLP-1, abinda ya sa hannayen jari na kamfanonin sarrafa abinci suka fadi kasa warwas a kasuwannin hada-hadar jari.
Da ma allurar wannan maganin da aka fara amfani da ita a can baya ta sa manyan kamfanonin sarrafa abinci irinsu Nestle da gidajen sayar da abinci sun fara ganin yadda kasuwar kayayyakinsu take yin kasa.
