Kwamishinan Ma’aikatar Muhalli da Gandun Dazuka ta jihar Gombe, Yusuf L. Jalingo, ya buƙaci al’ummar jihar da su ci gaba da bayar da cikakken goyon baya da haɗin kai domin tabbatar da nasarar gudanar da aikin tsaftar muhalli na wata-wata.
Kwamishinan ya yi wannan kira ne jim kaɗan bayan kammala aikin tsaftar muhalli na watan Oktoba, wanda aka gudanar a ranar Asabar, 31 ga Oktoba, 2026.
Yusuf Jalingo ya bayyana cewa matakin bin dokokin tsaftar muhalli a wannan karon abin a yaba ne, inda ya jinjinawa al’ummar da suka fito domin share muhalli da tsaftace muhallansu.
Sai dai ya ce an samu wasu mutane da ba su bi ƙa’ida ba, waɗanda aka umarce su da su share muhallansu nan take, yayin da aka rufe wasu shaguna saboda rashin bin dokokin tsaftar muhalli.
Ya ce ma’aikatar za ta ɗauki matakan da suka dace domin dakile wannan dabi’a a yayin gudanar da tsaftar muhalli na gaba.
Ya ƙara da cewa kotun tafi-da-gidanka tana nan daram domin gurfanar da duk wani direban abin hawa da aka kama yana karya dokokin tsaftar muhalli a wuraren binciken da aka tanada.
Kwamishinan ya kuma yaba wa jami’an tsaro bisa gudummawa da ƙoƙarin da suke bayarwa wajen tabbatar da bin dokokin, tare da tabbatar da cewa za a ƙara tura jami’an tsaro zuwa wuraren da ake fama da ƙarancin jami’an ’yan sanda domin tabbatar da cikakken bin ƙa’ida.
Wakilinmu, wanda ya sa ido kan yadda aikin ya gudana tare da kwamitin tsaftar muhalli, ya rawaito cewa manyan wuraren kasuwanci da suka haɗa da babbar kasuwar Gombe da Dankombo Mega Park sun kasance a rufe, lamarin da ke nuna bin dokokin tsaftar muhalli.
Sai dai an ga wasu manyan motocin dakon kaya suna zirga-zirga a yankunan Liji da New Mile Three a lokacin gudanar da aikin.
