Manyan Magoya Bayan Obi Sun Fice Da Kafa Kungiyar Movement Nigeria
Wasu daga manyan jami’an siyasar dan takarar adawa a Najeriya wato Peter Obi sun barranta daga tafiyar da kafa wata kungiyar cimma sabon muradi don babban zaben 2027.
‘Yan siyasar sun koka cewa tafiyar ta su mai taken OBIDIENTS ta sauka daga kan manufofin kare martabar dimokradiyya
“A matsayinmu na masu tafiyar farar hula mun yi amanna cewa tsarin siyasa na cikin abubuwan da kan kawo cigaban kasa, za mu dage wajen hulda da wadanda su ka cancanta, cikin gaskiya da bin ka’ida ga sauran tafiyar dimokradiyya ko jam’iyyun siyasa. Wannan tafiya ce ta ma’aikata da ke fafutuka..” Inji madugun tafiyar mai taken MOVEMENT Nigeria Prince Kolade Ademola.
Ademola ya ce ba lallai a yanzu su na da wanda za su marawa baya ga babban zaben ba amma za su goyi bayan duk wanda su ka ga ya dace da tafiyarsu kuma ya karfafa cewa lokaci bai kure mu su ba.
‘Yan sabuwar tafiyar maza da mata sanya da riguna da hulunan hana-sallah masu tambarin kungiyar, na nuna rashin daidaito da tuntubar da ta dace ya sa su kaucewa tafiyar Peter Obi wanda ya zo na uku a yawan kuri’a a zaben 2023.
Mataimakin sakataren jam’iyyar LEBA na kasa wacce Obi ya yi ma ta takara Dokta Joseph Liran ya ce sam ba don dalilin kaurar Obi zuwa jam’iyyar ADC ya sa su barranta daga tafiyar ba “Obi ya na da ‘yancin shiga kowace jam’iyya mu ma mu na da namu ‘yancin”
Shi ma ma’ajin jam’iyyar LEBA Malam Hamisu Santuraki ya ce ba za su ce dole sai muradun LEBA za a bi ba a madadin ra’ayin jama’ar kasa.
Hakanan Santuraki ya ce sun kawo karshen takaddamar shugabancin jam’iyyar ta LEBA bayan hukuncin kotun koli da ya kawar da jagorancin Julius Abure.
Irin wannan tafiya ba sabon abu ba ne a shekarar siyasa inda ‘yan siyasar ke duba
