Hukumar yaki da sha da fataucin miyagun kwayoyi ta kasa (NDLEA) ta kama wani dan kasuwa mai shekaru 55, Onuigbo Ndubisi Chinedu, bisa zargin yunkurin fitar da kilo 3.3 na hodar iblis da aka boye a cikin kwali na kayan abinci da za a tura zuwa Birtaniya.
Kakakin NDLEA, Femi Babafemi, ya ce an kama mutumin ne bayan jami’an hukumar sun tare kayan a filin jirgin sama na Murtala Muhammed da ke Legas, inda bincike ya gano shi ne jagoran wata kungiyar safarar miyagun kwayoyi.
Hukumar ta kuma kama wata ‘yar kasuwa mai shekaru 31, Emmanuella Chukwu-Edo, bayan kwace kilo 2.8 na wani nau’in tabar wiwi mai suna Loud da aka shigo da shi daga Amurka.
Hakazalika, NDLEA ta ce ta kwato kwayoyin maganin Tapentadol 250mg miliyan 2.24 da darajarsu ta haura Naira biliyan 2.2 daga wani kaya da ya fito daga Indiya.
A tashar jiragen ruwa ta Apapa kuwa, jami’an hukumar sun gano buhuna 4,777 na tabar wiwi nau’in Canadian Loud mai nauyin kilo 2,388.5 da darajarta ta zarce Naira biliyan 7.1, wadda aka boye cikin motoci uku a cikin kwantena.
A jihar Katsina, NDLEA ta kama wasu mutane biyu dauke da harsasai 396 na bindigogi, tare da mika su ga hukumomin tsaro domin ci gaba da bincike.
A jihar Edo kuma, hukumar ta kwace kilo 1,286 na tabar wiwi da kilo 86 na irin ta, sannan ta kama wasu mutane biyu dauke da kilo 73 na tabar wiwi. NDLEA ta ce tana ci gaba da matsa kaimi wajen dakile safarar miyagun kwayoyi a fadin kasar.
